An Cód Iompair

An Cód Iompair Gnó agus Eitice Gnó

Réamhrá

Is comhlacht reachtúil neamhspleách é an Coimisiún Toghcháin (an Coimisiún) atá freagrach as raon leathan d’fheidhmeanna toghcháin in Éirinn. Is é cuspóir an Choimisiúin a chinntiú go gcothaítear na caighdeáin ionracais, macántachta agus eitice gnó is airde ar fad ar fud na heagraíochta.

Leagtar amach sa Chód seo na treoirlínte agus na prionsabail a gcloífear leo chuige sin, agus ceaptar é chun na hoibleagáidí a bhíonn ar chomhaltaí agus ar fhoireann an Choimisiúin a léiriú agus iad ag tabhairt faoina ndualgais phoiblí faoin Acht um Athchóiriú Toghcháin, 2022 agus ag comhlíonadh ceanglais agus oibleagáidí reachtúla eile.

Tá na ceanglais faoin gCód seo i bhfeidhm anuas ar na hoibleagáidí faoi na hAchtanna um Eitic in Oifigí Poiblí, 1995 agus 2001 ina n-éilítear go gcomhlíonfadh comhaltaí an Choimisiúin Ráiteas Leasanna bliantúil i mí Eanáir gach bliain.

Prionsabail

Tá an Coimisiún tiomanta do na caighdeáin eiticiúla is airde a chinntiú ina chuid oibre agus déanfaidh sé a dhícheall i gcónaí cloí leis an tiomantas sin trí phrionsabail na freagrachta, an ionracais, na macántachta, na dílseachta, an tiomantais a chomhlíonadh, agus comhlíonfaidh sé gach oibleagáid reachtach agus rialála ábhartha.

Freagracht

Comhlíonfaidh comhaltaí an Choimisiúin agus na baill foirne ag a bhfuil poist fostaíochta ainmnithe a n-oibleagáidí faoi na hAchtanna um Eitic.
Fónann agus gníomhaíonn comhaltaí an Choimisiúin i gcomhchumas corparáideach chun tacú le hobair an Choimisiúin Toghcháin.
Ní dhéanann comhaltaí an Choimisiúin ionadaíocht ar a leasanna féin ná ar aon leas eile.
Comhlíonann comhaltaí an Choimisiúin a n-oibleagáidí faoin Acht um Athchóiriú Toghcháin, 2022 de mheon macánta agus le cúram agus dícheall cuí.

Ionracas

Cinnteoidh an Coimisiún cultúr agus cleachtas ina n-éilítear speansais dheimhnithe de réir mar is cuí do na riachtanais ghnó agus de réir dea-chleachtais san earnáil phoiblí trí chéile. Cloífidh an fhoireann ar fad agus comhaltaí uile an Choimisiúin leis na beartais a bhaineann le taisteal agus speansais.
Ní thabharfaidh ná ní bhfaighidh comhaltaí an Choimisiúin bronntanais chorparáideacha ná phearsanta, cóir ná sochair fhabhracha, ná fáilteachas seachas má bhaineann sé le gnó an Choimisiúin, a tugadh nó a fuarthas mar gheall ar a nasc leis an gCoimisiún nó mar gheall gur comhaltaí de chuid an Choimisiúin iad, nó a bhféadfaí le réasún a cheapadh gur tugadh nó go bhfuarthas iad mar gheall air sin.
Ní ghlacfaidh comhaltaí an Choimisiúin le haighneachtaí de chineál ar bith a dhéanann aon pháirtí nó duine, nó a dhéantar thar ceann aon pháirtí nó duine, a d’fhéadfadh tionchar a imirt ar neamhspleáchas/ionracas an Choimisiúin nó a bhféadfaí a mheas go bhféadfaidís tionchar a imirt ar neamhspleáchas/ionracas an Choimisiúin.
Éilítear ar na baill foirne cloí leis na treoirlínte a bhaineann le cur i bhfeidhm Chód Caighdeán agus Iompraíochta na Státseirbhíse, atá ar fáil ar https://www.sipo.ie/acts-and-codes/codes-of-conduct/civil-servants/COD-CAIGHDEAN.pdf.

Tiomantas

Aithnítear freagracht a bheith dílis do phrionsabail an Choimisiúin, i dteannta tiomantas do na caighdeáin eitice gnó is airde.
Freastalóidh comhaltaí an Choimisiúin ar gach cruinniú Coimisiúin, agus iad i láthair go pearsanta más indéanta, ach glacfar le freastal fíorúil.
Tá comhaltaí an Choimisiúin agus an fhoireann tiomanta don Chód Iompair agus Eitice Gnó seo, agus do na hoibleagáidí reachtúla ar fad.
I gcás fostaíocht eile a ghlacfadh Comhalta Coimisiúin a bhféadfadh coimhlint leasa, bíodh sí fíor nó braite, eascairt aisti, ba cheart í a sheachaint ar feadh bliain amháin i ndiaidh dheireadh a róil mar chomhalta Boird.

Comhlíonadh

Comhlíonfaidh comhaltaí an Choimisiúin agus na baill foirne ag a bhfuil poist fostaíochta ainmnithe a n-oibleagáidí faoi na hAchtanna um Eitic.
Feidhmíonn comhaltaí an Choimisiúin agus an fhoireann de réir an Chóid seo agus de réir na rialacha, na rialachán agus na treorach a ghlacann an Coimisiún ina chuid oibre.
Comhlíonann comhaltaí an Choimisiúin agus an fhoireann gach oibleagáid reachtach, reachtúil eile atá i réim agus gach beart rialála eile a théann i bhfeidhm orthu.
Comhlíonfaidh comhaltaí an Choimisiúin agus an fhoireann na nósanna imeachta tairisceana agus ceannaigh ar fad, chomh maith leis na leibhéil shonraithe údaráis chun caiteachas a cheadú.
Éilítear go gcomhoibrítear leis an iniúchadh inmheánach sa phróiseas iniúchóireachta inmheánaí.

Faisnéis

Agus aird ar nádúr a bpoist, bíonn faisnéis agus ábhar atá faoi rún ag an gCoimisiún ag comhaltaí uile an Choimisiúin agus an fhoireann ar fad. Coinneofar rúndacht i leith faisnéis a bhaineann le leasanna pearsanta, rúnda agus tráchtála.
Éascóidh comhaltaí an Choimisiúin agus an fhoireann rochtain ar fhaisnéis ghinearálta a bhaineann leis an gCoimisiún ar bhealach a chuireann leis an gcuntasacht don phobal i gcoitinne.
Ní eiseoidh comhaltaí an Choimisiúin ná an fhoireann faisnéis íogair ná phearsanta a bhaineann le haon duine gan cead an duine sin a fháil roimh ré.
Cinnteoidh comhaltaí an Choimisiúin agus an fhoireann go gcomhlíonfar forálacha reachtúla a bhaineann le cosaint sonraí agus faisnéise.
Éilítear ar iarchomhaltaí an Choimisiúin agus ar iarbhaill foirne rúndacht a choinneáil i leith ghnó an Choimisiúin. Ní choinneoidh comhaltaí an Choimisiúin cáipéisí a fuair siad i rith a dtéarmaí agus tabharfaidh siad aon cháipéis mar sin ar ais don Rúnaí nó cuirfidh siad in iúl don Rúnaí gur diúscraíodh na cáipéisí sin ar fad a bhí ina seilbh ar bhealach oiriúnach. Sa chás go dteastódh rochtain ó iarchomhaltaí ar pháipéir óna dtéarma féin, féadfaidh Rúnaí an Choimisiúin é sin a éascú.

Riarachán, an tIonad Oibre ina measc

Déanfaidh an Coimisiún:

Dea-chleachtas a chur i bhfeidhm sa riarachán seirbhíse poiblí trí bheartais agus cleachtais agus trí struchtúir oiriúnacha bainistíochta agus tuairiscithe chun úsáid chuí acmhainní agus rialuithe a chinntiú, rialuithe airgeadais ina measc.
A chinntiú go léirítear gníomhaíochtaí an ghnó go cruinn i bpleananna, tuarascálacha agus cuntais.
Comhlíonadh a chinntiú le reachtaíocht um chomhionannas fostaíochta, stádas comhionann agus míchumas, agus sláinte agus sábháilteacht na foirne ar fad a chur chun cinn agus a chothú.
Forbairt cultúir ionaid oibre atá dearfach, oscailte agus ionchuimsitheach a chur chun cinn, áit ar féidir leis an bhfoireann ábhar imní a tharraingt anuas gan a bheith buartha go mbainfí díoltas amach orthu dá bharr.
Cleachtais agus beartais oibre a chur i bhfeidhm atá inbhuanaithe go sóisialta, go geilleagrach agus ó thaobh an chomhshaoil de.
Oiliúint agus faisnéis a chur ar fáil a chuireann ar a gcumas do gach duine a ndualgais a chomhlíonadh.

Ginearálta

Éilítear ar chomhaltaí uile an Choimisiúin agus ar an bhfoireann ar fad feidhmiú laistigh de na treoirlínte seo sa Chód seo, a ceapadh chun a chinntiú go gcothaítear caighdeáin inghlactha ionracais sa Choimisiún.
Scaipfear an Cód seo agus an beartas maidir le nochtadh leasanna ar chomhaltaí uile an Choimisiúin agus ar an bhfoireann ar fad, agus admhóidh siadsan go bhfuair siad iad.
Déantar athbhreithniú ar an gCód seo de réir mar is gá, ach tráth nach déanaí ná gach dhá bhliain.

Seirbhísí & Rialachas Corparáideach

25 Aibreán 2023