Vótáil Inrochtana

Tá roghanna difriúla i bhfeidhm do dhaoine nach bhfuil in ann vóta a chaitheamh i láthair go pearsanta ag stáisiún vótála. Tá na roghanna sin ar fáil ar chúiseanna éagsúla, ina measc míchumas, cumas difriúil léitheoireachta agus scríbhneoireachta, tinneas nó gan a bheith i do ghnátháit chónaithe.

Féadfaidh vótálaithe nach bhfuil in ann vóta a chaitheamh ag stáisiún vótála:

Vóta a chaitheamh sa phost
Vóta a chaitheamh in ospidéal nó teach altranais (an Liosta Vótálaithe Speisialta)
An stáisiún vótála ina gcaitheann tú vóta a athrú
Cúnamh a fháil chun do vóta a chaitheamh

Vóta a chaitheamh sa phost

Réimse suntasach amháin a d’athraigh an tAcht um Athchóiriú Toghcháin, 2022 ná an clár rollach nó leanúnach a tugadh isteach. Dá bharr sin, is féidir le daoine a sonraí a thabhairt cothrom le dáta am ar bith den bhliain (seachas díreach roimh imeacht toghcháin).

Athrú eile a tháinig isteach leis an Acht um Athchóiriú Toghcháin, 2022 ná go bhfuil daoine a bhfuil míchumas nó tinneas meabhrach orthu incháilithe le cur isteach ar phostvótáil.

Chun iarratas a dhéanamh ar phostvótáil/vóta speisialta mar gheall ar thinneas, míchumas nó cúinse ar leith, beidh ort Foirm Iarratais PV2 a chomhlánú.

Íoslódáil Foirm PV2

Foirm Inrochtana

Braitheann spriocdhátaí na n-iarratas ar an gcineál imeachta toghcháin atá i gceist:

Dáil/Olltoghchán – Dhá lá tar éis dháta lánscor na Dála
Fothoghchán Dála – Dhá lá tar éis an t-ordú maidir le lá na vótaíochta a dhéanamh
Toghcháin an Uachtaráin, toghcháin Eorpacha, toghcháin áitiúla nó reifreann – 22 lá ar a laghad roimh lá na vótála (gan Domhnach, Aoine an Chéasta ná Laethanta Saoire Poiblí san áireamh)

Athrú ar stáisiún vótála a iarraidh

Bhí roinnt stáisiúin vótála fós dorochtana le haghaidh an imeachta toghcháin deiridh (toghcháin an 7 Meitheamh). Má bhaineann tú úsáid as cathaoir rothaí agus/nó má bhíonn deacrachtaí agat dul isteach i do stáisiún vótála, féadfaidh tú iarratas i scríbhinn a chur faoi bhráid Cheann Comhairimh do thoghlaigh. Caithfear iarratais chun vóta a chaitheamh i stáisiún vótála eile a fháil seachtain ar a laghad roimh lá na vótála.

Más féidir, ba cheart duit stáisiún vótála eile atá inrochtana agus a d’fheilfeadh duit a mholadh. Mura bhfuil cur amach agat ar na stáisiúin vótála i do cheantar féin, roghnóidh an Ceann Comhairimh stáisiún eile duit. Má thugann tú míniú ar an gcúis nach bhfuil do stáisiún reatha inrochtana duit, cabhróidh sé leis an gCeann Comhairimh ceann eile a roghnú duit.

Seolfaidh an Ceann Comhairimh údarú chun vótáil ag stáisiún vótála eile chugat. Ba cheart duit an t-údarú sin (chomh maith leis an ngnáthfhianaise ar d’aitheantas) a thaispeáint nuair a chaitheann tú vóta. Nuair a athraítear go stáisiún vótála eile thú, ní féidir leat vóta a chaitheamh ag do stáisiún áitiúil.

Cúnamh a fháil chun do vóta a chaitheamh

Féadfaidh daoine atá faoi mhíchumas cúnamh difriúil a fháil chun vóta a chaitheamh sa stáisiún vótála. Is féidir é sin a dhéanamh trí chúnamh a fháil ó:

Compánach
Oifigeach Ceannais
Teimpléad páipéir ballóide

Tá tuilleadh eolais anseo thíos faoi na cineálacha cúnaimh a bhíonn ar fáil nuair a chaitheann tú do vóta.

Compánach

Má tá lagú radhairc ort, má tá tú faoi mhíchumas fisiciúil nó má tá deacracht litearthachta agat nach ligeann duit vóta a chaitheamh gan chúnamh, is féidir leat compánach a thabhairt leat. Tugann tú cead don chompánach an páipéar ballóide a mharcáil ar do shon le do rogha féin. Ní mór don chompánach a bheith 16 bliana d’aois ar a laghad, agus ní fhéadfaidh gníomhaire toghcháin ná gníomhaire iarrthóra feidhmiú mar chompánach. Níl cead ag an duine sin cabhrú le níos mó ná beirt in aghaidh an toghcháin nó an reifrinn.

Oifigeach Ceannais

Má tá lagú radhairc ort, má tá tú faoi mhíchumas fisiciúil nó má tá deacracht litearthachta agat nach ligeann duit vóta a chaitheamh gan chúnamh, is féidir leis an Oifigeach Ceannais cabhrú leat do vóta a chaitheamh. Má roghnaíonn tú iarraidh ar an Oifigeach Ceannais cabhrú leat do vóta a chaitheamh, ba cheart duit dul chuig an stáisiún vótála i bhfad sula ndúnann sé. De réir an dlí, tá cead ag Oifigeach Ceannais diúltú d’iarratas ar chabhair i rith an dá uair an chloig deiridh den vótáil dá gcuirfí bac ar dhaoine eile vóta a chaitheamh trí chabhrú le toghthóir amháin vóta a chaitheamh.

Má chaitear vóta ar an tslí sin, téann an tOifigeach Ceannais agus aon ghníomhaire pearsanaíochta atá i láthair chuig áit éigin sa stáisiún vótála nach gcloisfí iad de thimpiste de ghnáth, ar mhaithe le do príobháideachas. Más gá, is féidir leis an Oifigeach Ceannais cead iontrála a chur ar fionraí agus daoine a chur amach as an stáisiún vótála chun príobháideachas agus rúndacht na ballóide a chinntiú. (Is mar gheall air sin ar féidir leis an Oifigeach Ceannais cabhair a dhiúltú sa dá uair an chloig deiridh den vótáil.)

Cuirfidh an tOifigeach Ceannais ceist ort faoin dóigh ar mhaith leat vótáil agus marcálfaidh an tOifigeach an páipéar ballóide de réir do roghanna. De réir an dlí, tá cosc ar Oifigeach Ceannais gníomhú de réir treoracha i scríbhinn a fhaightear ó vótálaí. Cinntítear leis sin go mbíonn an tOifigeach Ceannas ag gníomhú de réir do mhianta-sa agus nár chuir aon tríú páirtí isteach ar aon rud.

Teimpléad páipéir ballóide

Is gléas plaisteach trédhearcach a leagtar ar bharr an pháipéir ballóide é an teimpléad páipéir ballóide. Bíonn cló ardaithe agus braille ar an teimpléad, ionas gur féidir le daoine a bhfuil lagú radhairc orthu vótáil go neamhspleách. Is féidir leat an rogha sin a úsáid má tá lagú radhairc ort. Bíonn na páipéir bhallóide sin ar fáil ag gach stáisiún vótála ach iad a iarraidh.

Tá eolas breise faoi na teimpléid páipéir ballóide ar shuíomh gréasáin na Roinne Tithíochta, Rialtais Áitiúil agus Oidhreachta agus ar shuíomh gréasáin Vision Ireland (NCBI roimhe seo).

Uimhreacha Saorghlao do thoghthóirí a bhfuil lagú radhairc orthu

Ceatharlach-Cill Chainnigh	1800 500 000
An Cabhán-Muineachán	1800 78 78 78
An Clár	Audio recording
Corcaigh Thoir	1800 103 087
Corcaigh Thuaidh-Lár	1800 100 043
Corcaigh Thiar Thuaidh	1800 103 088
Corcaigh Theas-Lár	1800 100 321
Corcaigh Thiar Theas	1800 103 089
Dún na nGall	1800 832 015
Cuan Bhaile Átha Cliath Thuaidh	1800 911 574
Cuan Bhaile Átha Cliath Theas	1800 911 578
Baile Átha Cliath Láir	1800 911 579
Baile Átha Cliath-Fine Gall Thoir	1800 911 071
Baile Átha Cliath-Fine Gall Thiar	1800 911 070
Baile Átha Cliath Thiar-Meán	1800 911 073
Baile Átha Cliath Thiar Thuaidh	1800 911 581
Baile Átha Cliath-Ráth an Dúin	1800 911 075
Baile Átha Cliath Theas-Lár	1800 911 582
Baile Átha Cliath Thiar Theas	1800 911 074
Baile Átha Cliath Thiar	1800 911 072
Dún Laoghaire	1800 911 075
Gaillimh Thoir	1800 92 88 94
Gaillimh Thiar	1800 306894
Ciarraí	1800 622 574
Cill Dara Thuaidh	1800 111 000
Cill Dara Theas	1800 330 011
Laois	1800 832 010
Cathair Luimnigh	1800 832 073 (option 1)
Contae Luimnigh	1800 832 073 (option 2)
An Longfort-An Iarmhí	1800 832 016
Lú	1800 542 626
Maigh Eo	1800 600456
An Mhí Thoir	1800 808 809 (option 1)
An Mhí Thiar	1800 808 809 (option 2)
Uíbh Fhailí	1800 11 66 44
Ros Comáin-Gaillimh	1800 637 100
Sligeach-Liatroim	1800 333 406
Tiobraid Árann Thuaidh	1800 112222
Tiobraid Árann Theas	1800 112222
Port Láirge	1800 67 88 76
Loch Garman	1800 565 565
Cill Mhantáin	1800 868 399
Cill Mhantáin-Loch Garman	1800 868 399